Komisioni Qendror i Zgjedhjeve ka rrëzuar kërkesën e avokatit të Aqif Rakipi, Theodhori Sollaku, i cili kërkoi të pezullohet kërkesa e prokurorisë.
KQZ u mblodh sot në 13:00 për të diskutuar kërkesën e Prokurorisë për heqjen e mandatit për deputetin e PDIU Aqif Rakipi dhe atë të LSI, Gledion Rehovica.
Avokati Sollaku tha se kërkesa e Prokurorisë është në shkelje të ligjit, pasi sipas tij Aqif Rakipi nuk është dënuar nga asnjë vend i BE:
“Aqif Rakipi nuk është dënuar nga asnjë vend i BE dhe nuk është shpallur në kërkim ndërkombëtar. Aqif Rakipi nuk është dëbuar nga shtetet sipas ligjit dhe në situata të tilla nuk është hequr mandati”.
Komisioni Qendror i Zgjedhjeve pritet të vendosë sot për fatin e mandatit të dy deputetëve të Parlamentit të Shqipërisë, Aqif Rakipit të PDIU-së dhe Gledion Rehovicës së LSI-së.
Dy deputetët e Kuvendit akuzohen se kanë fshehur ndalimet në shtetin italian dhe kanë përdorur gjeneralitete të rreme.
