Një klinikë në Kirgistan, u detyrua të hidhte 1.000 vaksina kundër koronavirusit, të prodhuar nga kompania ruse, Sputnik V, për shkak se dikush nga stafi kishte hequr nga priza frigoriferin ku mbaheshin dozat, për ta karikuar telefonin.
Këto vaksina ishin pjesë e një kontingjenti prej 20 mijë dozash të dhuruara nga Rusia si ndihmë humanitare për Kirgistanin, një shtet i varfër i Azisë Qendrore, shkruan Barrons.
Ministria e Shëndetësisë është kritikuar për këtë incident, i cili u bë i ditur këtë javë, por që në fakt kishte ndodhur gjatë muajit prill të këtij viti.
Ndërkohë, Ministri i Shëndetësisë, Alimkadir Bechenaliyev, ka deklaruar se njëri nga punonjësit mund të jetë përgjegjës për këtë gabim.
Ai u shpreh se nëse njëri nga ta del të jetë fajtor, klinika duhet të përgjigjet financiarisht ndaj dëmit në fjalë.
Kirgizstani është përfshirë nga vala e tretë e pandemisë me më shumë se 100 mijë raste të infektuarish dhe 1735 të vdekur.
