Ministrja e Shëndetësisë dhe Mbrojtjes Sociale, Ogerta Manastirlliu, ishte për një vizitë në QSUT, ku vëzhgoi punimet e fundit për vënien në funksion të spitalit të ri të kirurgjisë.
Përmes një postimi në Facebook, Manastirlliu shprehet se sallat e reja të operacionit nuk do të kenë asgjë mangët, dhe se qytetarët do ta marrin shërbimin në kohë dhe me standarde evropiane.
Spitali i ri i Kirurgjisë në QSUT është një investim me vlerë 8.8 milion euro, ku do të përqendrohet i gjithë shërbimi i kirurgjisë, përfshirë edhe urgjencën. Spitali i ri i kirurgjisë do të ketë një kapacitet me 120 shtretër, duke bërë të mundur transferimin e të tre klinikave të kirurgjisë së përgjithshme në këtë godinë.
Spitali i ri do të ketë 7 salla operacioni (Urologji, Kirurgji e Përgjithshme, Tiroidet, Toraksi, Kirurgji Abdominale, me një kullë laparoskopie secila), njëra prej të cilave krejtësisht digjitale, që ju shërben edhe studentëve të mjekësisë për të ndjekur nga afër ndërhyrjet operatore në praktikën e tyre klinike.
Postimi i plotë:
Edhe pak dhe jemi gati
Sallat e reja të operacionit në “QSUT” nuk do të kenë asgjë mangut, krahasuar me spitalet më të mira në Evropë.
Sepse qytetarët shqiptarë që kanë nevojë për ndërhyrje kirugjikale, meritojnë ta marrin shërbimin në kohë, dhe mbi të gjitha me standarde.
Ndërsa mjekët-heronj që u shërbejnë atyre çdo ditë, meritojnë ta ushtrojnë profesionin në kushte të njëjta me kolegët e tyre në vendet e zhvilluara.
Që kemi ende shumë për të bërë, jemi ne të parët që e themi. Mirëpresim çdo kritikë në funksion të përmirësimit të shërbimit mjekësor për qytetarët, por nga ana tjetër, herë pas here duhet edhe të kthejmë pak kokën pas, për të kujtuar se në 6 vite kemi treguar se “e pamundura”, duke punuar çdo ditë nga pak, ia ka lënë dalëngadalë vendin të mundurës.
