Lewis Hamilton është duke menduar për të ardhmen dhe për angazhimet që ai do të ketë pasi të japë divorcin nga Formula 1. Këtë ai e ka konfirmuar në një intervistë për mediat braziliane, ku është shprehur se është duke u marrë me disa projekte që do ti vërë në zbatim shumë shpejt.
“Kam edhe cilësi të tjera përveç pilotimit në Formulën 1, që po kërkoj t’i shfaq. Kam interesa edhe në fusha të tjera, që unë e di se jam shumë i aftë. Një ditë unë do të largohem nga garat për t’iu dedikuar gjërave të tjera. Shpresoj që njerëzit të pranojnë dhe vlerësojnë zgjedhjet e mia, ashtu sikurse po bëjnë me profesionin tim aktual. Projektet e mira shkojnë përtej garave, por unë nuk do të zbuloj se për çfarë bëhet fjalë”, tha Hamilton.
Duket qartë që Hamilton nuk do të jetë më i përkushtuar në botën e automobilizmit pasi të heqë dorë nga garat e Formula 1. Ndryshe nga spanjolli Fernando Alonso që është i vendosur që do të marrë pjesë në kompeticione të tjera të automobilizmit. Hamilton mbështet idenë që në momentin që garon në Formula 1, nuk mund ta provosh më veten diku tjetër, pasi ti e ke prekur majën.
“Po jetojmë një periudhë ku pilotët janë në gjendje që të bëjnë gjithçka. Unë nuk kam dëshirë të garoj në kampionate të tjera, edhe pse e admiroj shumë atë që po bën Alonso. Për mendimin tim, Formula 1 është kulmi i karrierës së një piloti”, shtoi më tej Hamilton.
