Pozitat e Luciano Spallettit në stolin e Interit duket se tashmë kanë marrë drejtim dhe tashmë drejtuesit e klubit milanez krahas objektivit Champions dhe zgjidhjen e çështjes Icardi janë duke punuar edhe për të gjetur zëvendësuesin e trajnerit toskan. Deri para pak kohësh në podin e kandidatëve potencialë qëndronte Antonio Conte, duke u ndjekur nga alternativa e Jose Mourinhos.
Por gjatë orëve të fundit mediat italiane kanë dalë me një lajm surprizues. Beppe Marotta është duke menduar seriozisht për mikun e tij Massimiliano Allegri. Përshtypja e parë në fakt është se edhe tekniku i kampionëve në fuqi të Italisë mund të mbyllë në fund të sezonit aventurën e tij me bardhezinjtë e Juventusit pavarësisht gjithçkaje, çka do të thtotë se si me eliminimin në 1/8 e Championsit apo edhe arritjes në Madrid, Allegri me shume gjasa do t’i japë puthjen e lamtumirës zonjës së tij të vjetër, për të nisur në këtë mënyrë një projekt të ri.
Në këtë kontekst duket sikur tingëllon më probabël që të pranojë ofertën e ndonjë prej skuadrave të mëdha evropiane, por zikaltërit duket se mund të tentojnë maksimumin për të bindur Allegrin të vijojë qëndrimin në Serinë A. Qëndron fakti se Marotta dhe presidenti Zhang Jr janë të gatshëm ti konfirmojnë një angazhim financiar shumë të lartë me 7,5 milionë euro në sezon. Tashmë mbetet vetëm për tu kuptuar nëse Konti Max do të largohet vërtet nga klubi torinez dhe a do të ketë kurajon të sfidojë ex-in e tij duke përfaqësuar ato që tani janë ngjyrat e rivalit më të madh të Juves së tij.
