Prokurori Besim Hajdarmataj ka treguar sot në seancën gjyqësore për çështjen “Babale”, njohjen e tij me Alfred Veliun. Ai ka thënë se e ka pritur në Prokurorinë e Krimeve të Rënda, dhe ka pasur vetëm një takim me të e më pas ka lajmëruar Shërbimin Informativ. Hajdarmataj kujton se takimi mes palëve ka ndodhur në muajin nëntor të vitit 2017.
“Babalen e kam takuar në muajin nëntor 2017, në cilësinë e drejtuesit të Prokurorisë për Krime. Jam telefonuar nga recepsioni që një person kërkonte të më takonte, se kishte diçka të rëndësishme. E prita në zyrë dhe më tha që kam dijeni për një trafik të mundshëm, ku sipas tij, ishin të përfshirë policë dhe vëllai i ministrit të Brendshëm. E pyeta për personalitetin dhe me rezultonte i dënuar në Itali. Këtu e kam ndërprerë bisedën me të. Kam lënë takim me një nga drejtuesit e SHISH, që mbulonte çështjet e trafikut. I thamë të vinte sërish”, u shpreh prokurori.
Më tej ai ka shpjeguar se i ka kërkuar SHISH ta trajtojnë si informator, pasi vetë nuk kishte të dhëna konkrete. Kur në zyrë i kishte ardhur një nga drejtuesit e SHISH, aty i kishte shpjeguar situatën. Besim Hajdarmataj ka thënë më tej se kishte kërkuar që ta trajtonin si informator, pasi nuk i kishte prezantuar të dhëna konkrete.
“Të nesërmen në zyrë erdhi një nga drejtuesit e SHISH, dhe i shpjegova situatën. U kërkova ta trajtonin ata si informator. Sepse mua s’më prezantoi të dhëna konkrete apo prova. Pse unë kërkova SHISH? Lidhej me faktin që personi fliste për implikim të policisë. SHISH ishte i vetmi që na kishte informuar për rastet e kultivimit të drogës. Me Alfred Veliun s’kam pasur më asnjë kontakt”, mësohet të ketë thënë Hajdarmataj.
