Ish-prokurori Shkëlqim Hajdari ka komentuar situatën e shkaktuar në aeroportin e Rinasit, ku fluturimet u ndërpenë për dy ditë, pasi kontrollorët e Albcontrol bojkotuan punën.
I ftuar në emisonin “Breaking”, Hajdari u shpreh se pretendimet e tyre mund të jenë të ligjshme, por mënyra që zgjodhën për të realizuar qëllimet e tyre është në kundërshtim me kontratën e tyre, dhe menduan se ishin të pazëvendësueshëm.
Ndër të tjera, Hajdari tha se nga qeveria nuk ka asnjë shkelje të ligjit, pasi është domosdoshmëri jetike mbajtja hapur e kontrollit ajror.
Shkëlqim Hajdari: ”Unë kam thënë që në fillim kthehuni në punë se jeni në kufijtë e konsumimit të veprës penale. Procedimi penal ka nisur, një pjesë e tyre janë arrestuar. Duhet të shërbejë për ta shkundur atë institucion, që përveç punës së madhe, ka qenë i përkëdhelur. Pretendimet e tyre mund të jenë të ligjshme, por mënyra që zgjodhën për të realizuar qëllimet e tyre është në kundërshtim me kontratën e tyre. Ju dukej vetja të pazëvendësueshëm.
Por, erdhën kontrollorë nga Turqia dhe Greqia që i kemi vende të NATO-s, kështu ka ndodhur edhe në vende të tjera. Mendoj se nuk do rrinë gjatë, pasi pjesës më të madhe të kontrollorëve shqiptarë u ka ikur e dehura. Në kodin e punës, shërbimi i transportit ajror e disa shërbimeve jetike, i konsideron që punonjësit që nuk mund të futen në grevë. Është e ndaluar ligjërisht ndalimi i punës në këto shërbime. Ata mund të jenë në të drejtën e tyre, por rruga që zgjodhën është anti-ligjore. Nuk mund të ndërpritet menjëherë trafiku ajror”.
