Në kuadër të ristrukturimit të institucioneve dhe agjencive të ndryshme që do të ndërmarrë qeveria “Rama 2”, një nga institucionet është Inspektorati.
Kreu i Inspektoratit të Përgjithshëm, Shkëlqim Hajdari, thekson se në kuadër të këtij procesi ristrukturimi nga 16 inspektorate shtetërore, do të shkohet te rreth 6 ose 7 inspektorate.
“Duke i riformatuar mbi bazën e objektit të kontrollit dhe të inspektimeve që bëjnë, qëllimi për të cilin janë ndërtuar, sigurisht që do të kemi një numër shumë më të ulët se sa janë tani. Aktualisht kemi vetëm 16 inspektorate shtetërore, duhet të shkojmë te rreth 6 ose 7 inspektorate”, u shpreh Hajdari në një intervistë për “Ora News”.
Ai shpjegoi se kjo do të bëjë të mundur modernizimin e këtij institucioni dhe do të rritet cilësia e shërbimit, gjë e cila, sipas Hajdarit, tenton të shmangë rastet abuzive dhe korruptive.
Për këtë arsye, ai i bën apel bizneseve që të mos pranojnë asnjë trupë inspektimi që tenton ti bëjë inspektimet me blloqe kur çdo gjë duhet të kryhet online.
“I bëj thirrje bizneseve, të mos pranojnë asnjë trupë inspektimi, asnjë inspektorat që t’i bëjë inspektimet me blloqe, në mënyrë klienteliste, korruptive. Pra, të përmbushin të gjithë detyrimin ligjor që kanë, për ta bërë inspektimin si proces administrativ të ndershëm nëpërmjet dokumenteve standarde, me një procedurë të rregullt dhe vetëm online”, thekson Hajdari.
Ndërsa shpjegon se e gjithë trupa e 16 inspektorateve në vend është trajnuar në mënyrë profesionale nga inspektorati qendror. “Deklaroj me përgjegjësi të plotë që të gjithë trupat e inspektimit, të të 16 inspektorateve shtetërore, janë trajnuar nga inspektorati qendror, janë pajisur me të gjitha pajisjet për ta kryer inspektimin online. Inspektimi me blloqe, inspektimi me duar në xhepa, inspektimi që “kemi dalë njëherë për të parë si je me shëndet do vijmë prapë nesër”, është histori mesjetare, korruptive”, përfundon kreu i Inspektoriatit Qendror, Shkëlqim Hajdari.
