Eurokomisioneri për Zgjerim, Johanes Hahn ka vlerësuar si të rëndësishme kërkesën e ligjit të gjuhëve, por ka thënë se kjo çështje nuk është një prioritetet e Brukselit, që kërkohet nga Maqedonia në rrugën e saj të integrimit.
Hahn doli dje pas takimit me kryeministrin Zoran Zaev në një konferencë të përbashkët për shtyp, ku tha se autoritetet e Maqedonisë duhet t’i shënojnë sferat prioritare për të cilat do të fitojnë vlerësime pozitive nga Brukseli.
Më tej, eurokomisioneri tha se ligji për gjuhët kalon nëpër procedurë kuvendore dhe se ai është miratuar në fazën e parë, në bazë të rekomandimeve paraprake nga Komisioni i Venecies, por shtoi se për momentin është me rëndësi Qeveria të përqendrohet në ligjet dhe në përmbushjen e kushteve për fitimin e rekomandimit pozitiv.
“Ligji për gjuhët nuk është pjesë e asaj që është dakorduar në këtë kontekst, por edhe një herë do të them se në Bruksel angazhohemi që fokusi të vendoset në prioritetet, nëse kjo çështje mund të zgjidhet në kushte të tilla në rregull, nëse ka nevojë të definohen prioritetet, atëherë ato duhet të definohen sipas interesave kombëtare”, tha Hahn.
