Florian Haçkaj, menaxher komercial i kibernetikës, në një lidhje skype me studion e lajmeve në MCN TV, teksa komentoi për sulmin kibernetik tha se kjo tregon qartë rënien e shtetit. Ai u shpreh se kjo është një çështje e ndjeshme, sepse ka të bëjë me të dhënat personale. Haçkaj iu referua që kur dolën të dhënat nga patronazhistët, duke thënë se ka pasur indicie të qarta se ka pasur porta të hapura në sistemet e AKSHI-t. Ai propozoi të ngrihet një ekip ekspertësh jopartiak, pasi çdo sulm dhe rrezik është i mundshëm. Ndër të tjera citoi se shteti shqiptar ka për detyrë të ribëjë kartat e identitetit të reja, edhe pasaportat me numër të ri për qytetarët.
“Për fat të keq dolën shumë gjëra nga raporti, kjo është totalisht rënia e shtetit. AKSHI është sipërfaqja ndërvepruese me qytetarin dhe nëse ato kanë dalë, tregon që është shteti i rënë. Është çështje e ndjeshme sepse ka të bëjë me të dhënat personale.
E kam shprehur që kur kanë dalë të dhënat me patronazhistët, ka pasur indicie të qarta se ka pasur porta të hapura në sistemet e AKSHI-t, por një diçka që e kam këshilluar atëherë duhet të shihet se deri ku ka shkuar dëmi. Ne sot ende e kemi e-albania online. Nëse është bërë një back up për ta vënë sa më shpejt e-albania në përdorim i bie që dhe ai back up të jetë i dëmshëm. Duhet sa më shpejt një ekip ekspertësh jo partiak, sepse është qeveria ajo që ka bërë këtë lëmsh ku ne ndodhemi sot sepse çdo e dhënë e jona është në treg. Çdo sulm dhe rrezik është i mundshëm fatkeqësisht me këto të dhëna që kanë në dorë. Sot shteti shqiptar ka për detyrë të ribëjë kartat e identitetit të reja, edhe pasaportat me numër të ri për qytetarët”.
Pak ditë më parë, Ministri i Mbrojtjes Niko Peleshi deklaroi se sistemet e sigurisë dhe mbrojtjes nuk janë prekur nga sulmet kibernetike, pasi janë të shkëputura nga rrjeti i përgjithshëm i komunikimit dhe informacionit. Në një deklaratë për shtyp me zv/sekretarin e përgjithshëm të NATO-s, James Appathurai, Peleshi u shpreh se dy sulmet ndaj sistemeve digjitale treguan se duhen investime më të mëdha në mbrojtjen kibernetike.
