Presidenti amerikan Donald Trump ka pasur “bisedime të drejtpërdrejta” me regjimin në pushtet të Koresë së Veriut në një “nivel jashtëzakonisht të lartë” dhe do të zbulojë se “mjaft shpejt” do të takojë Kim Jong-un, raporton dailystar.co.uk.
SHBA ka “filluar drejtpërdrejt bisedime me Korenë e Veriut”, u tha Trump gazetarëve të martën pas takimit me kryeministrin japonez Shinzo Abe.
Duke folur në vendpushimin e tij në Mar-a-Lago në Florida, Trump tha se ishte i kënaqur me progresin që SHBA kishte bërë në hapat e ngritjes së një samiti me Kim Jong-un.
Ai tha: “Ne kemi pasur bisedime të drejtpërdrejta në nivele shumë të larta, nivele jashtëzakonisht të larta me Korenë e Veriut”.
Zyrtarë të lartë amerikanë më vonë konfirmuan se Sekretari i Shtetit Mike Pompeo bëri një vizitë sekrete në Korenë e Veriut gjatë fundjavës së Pashkëve dhe u takua me Kim.
Trump ka rënë dakord të takohet me Kim, duke hapur rrugën për një takim të pashembullt midis dy liderëve botërorë që u mburrën me madhësinë e butonave të tyre bërthamorë vetëm disa muaj më parë.
Lejimi i Koresë së Veriut për të marrë pjesë në Olimpiadën Dimërore në Korenë e Jugut ishte katalizatori për një shkrirje në marrëdhëniet, tha Trump.
Por Trump sugjeroi se “nuk do të kishte ndodhur” pa kontributin e tij, që përfshinte kërcënime për të lëshuar “zjarr dhe tërbim” në Korenë e Veriut.
Bisedimet e tij me zyrtarë të profilit të lartë në regjimin e Kim “lejon vullnetin e mirë” dhe tregon se “po ndodhin gjëra të mira” në ndjekjen e paqes në gadishullin Korean.
Trump shtoi: “Do të shohim se çfarë ndodh, sepse përfundimisht është rezultati përfundimtar që llogaritet, jo fakti që ne jemi duke menduar për të pasur një takim”.
Ai gjithashtu mbështeti përpjekjet midis Koresë së Jugut dhe Veriut me qëllim që të përfundonte një gjendje lufte që ka ekzistuar midis dy vendeve që nga viti 1953.
“Ata kanë bekimin tim për të diskutuar përfundimin e luftës. Njerëzit nuk e kuptojnë se Lufta Koreane nuk ka përfunduar,” tha ai.
“Po ndodh tani dhe po diskutojnë për një fund të luftës. Ata kanë bekimin tim dhe kanë bekimin tim për ta diskutuar këtë”. TIRANA TODAY
