Gjykata e Krimeve të Rënda ka vlerësuar sot masën e sigurisë për Nazer Seitin, i cili u kap në tetor në një operacion policor në fshatrat e Vlorës dhe akuzohet se është i përfshirë në dosjen e Habilajve.
Prokuroria ka kërkuar masën e sigurisë “arrest me burg” pa afat për Nazer Seitin pasi ka njoftuar për prova të reja, ndërsa më herët Gjykata caktoi masën e sigurisë 20 ditë burg për të, për qëllim ekstradimi drejt Italisë.
Kështu, Gjykata e Krimeve të Rënda ka pranuar kërkesën e Prokurorisë, duke vendosur masën “arrest me burg” për Seitin. Mësohet se Prokuroria ka paraqitur prova të reja, konkretisht përgjime nga dosjen italiane ku Nazer Seiti ka qenë me Florian Habilajn.
Nezar Seiti kërkohet nga prokuroria e Katanias, Itali, pasi akuzohet për trafik të lëndëve narkotike. Seanca gjyqësore u ndërpre më herët pasi avokati i Seitit kërkoi kohë për t’u njohur me dokumentet e prokurorisë.
Mësohet se Seitit i është ofruar statusi i bashkëpunëtorit, por ai e ka refuzuar atë, duke deklaruar vetëm se ka lidhje krushqie me Habilajt, pasi e shoqja e tij i ka kushërinj.
Ai ka pranuar se udhëtonte shpesh drejt Italisë, sipas tij në kërkim të punëve të ndryshme dhe se kthehej shpesh në Shqipëri për të parë prindërit e moshuar që banojnë në Vlorë.
