Mesa duket, çështja e Teatrit nuk është çështje aktorësh, por çështje ryshfeti, korrupsioni, manipulimi. Guljelm Radoja është i mendimit se protesta ishte thjeshtë një shfaqje, e sot kanë fituar ata që i bënin fresk pushtetit, pushtetarëve. I ndjerë i fyer nga kjo situatë që ka përçarë artistët në dy kahe, ai lutet se mbase do të vijë një ditë që ata që dhanë firmën, ti kapë turpi e ti vrasë ndërgjegjja, pasi nuk vranë vetëm palën tjetër të artistëve, por vranë edhe kohën e historikun e saj. Ai flet për turp, për ata që do të kenë turp të shohin hijen e tyre. Po vallë, a do të ndodhë kjo gjë një ditë?
“Në këtë lloj zullumi që këta njerëz na provokuan që të bëhemi hasëm me njëri-tjetrin, unë isha i bindur se do të fitonte qytetaria, dhe jo ata që i bënin fresk pushtetit, pushtetarëve, që kurrë në jetën e tyre nuk arritën të hyjnë dhe të shohin një shfaqje, këta që e panë vetën në karriget e pushtetit, këta anonimatë, arritën në këtë gjendje, që kishin kënaqësi të na bënin të vuanim.
Mbase një ditë edhe këta do t’i kapë turpi dhe kur të shohin veten në pasqyrë do thonë: “çfarë bëmë kështu?”.
Megjithatë unë mendoj se këta nuk e njohin nocionin e fjalës “turp”.
Gjatë fjalës së tij, aktori u kthye pas në të shkuarën, duke rrëfyer një histori nga i ati. Bëhej fjalë për një mjek, të cilit i kërkuan që të operonte kryeministrin “e asaj kohe”, dhe ndërsa u nis për në sallë, shoqëruesit e tij, i thanë që të vinte firmën që do të operonte kryeministrin.
“Ah jo, i tha doktori, firmën e vendos pacienti, ata që e shoqërojnë pacientin (Teatrin), unë operoj, hoqi bluzën dhe iku në shtëpi”, ka përfunduar rrëfimin Radoja.
“Duket se kjo specie burrash, ishte specie në zhdukje, siç thotë dhe Flutra Açka për një kolegun tonë: Erdhën këta burrat ku*va…. këta që kanë kënaqësinë që ne të na lënë pa gjum”, u shpreh ai.
Mjaft i revoltuar, e duke mbajtur një fjalim me mjaft peshë, ai paralajmëron se për asnjë arsye nuk duhet të bëjnë show mbi kufomat e tyre.
“Unë, qytetari Guljelm Radoja, e sfidoj këtë qeveri, këtë anonimat… dhe si aktor nuk do t’i lejoj kurrë luksin atyre, që të vijnë të bëjnë homazhe në kufomën time. Siç i sfidoi Bujar Lako, edhe Fadil Kujovska, edhe Fatos Çela… Jo thanë! Nuk duhet të vinë të bëjnë show me kufomat tonë, do shkojmë atje si qytetarë”, tha aktori.
