“Ultras Guerrils” nuk ndalen së akuzuari drejtuesit dhe lojtarët e Partizanit për formën e dobët që ka treguar ekipi në këto 8 javë të para në kampionat. Për këtë arsye ata kanë bërë një postim në rrjetin social Facebook, ku i bëjnë thirrje presidentit Demi që të zgjohet dhe të vejë dorë mbi ekipin. Akuza të forta ngrenë për lojtarët që nuk japin gjithçka në fushë, por e kanë mendjen të pinë dhe të lozin skedona. Drejtuesit që u ke dhënë çelësat e ekipit nuk dinë të bëjnë gjë veçse të fshihen. Ata i kërkojnë të bëjë diçka presidentit, pasi janë pikërisht ata që e vuajnë këtë situatë të dobët të ekipit.
Postimi në facebook:
“Lojtarë liliputë dhe drejtues të paaftë prej 5 vitesh!
Po ty president? A nuk të vjen pak inat? A nuk shqetësohesh ndopak? Apo nuk ka problem, ti fjalën tënde e ke thëne për 70 vjetor. Vitet para i kemi, ke thënë. Fundja je brenda objektivit që ke caktuar!
Por neve na dhemb shpirti kur shohim se pas humbjeve lojtarët zgërdhihen sapo lënë stadiumin. Harbohen nëpër lokale dhe meqë nuk mbushin dot me pikë tabelën e renditjes, mbushin me foto facebook-un dhe instagramin. Trofetë e vetme të lojtarëve dhe drejtuesve janë shishet e boshatisura dhe skedinat-çarçaf! “Kampionë” të vërtetë!
Ky sezon u dogj që pa nisur dhe përgjegjësi kanë të gjithë, por askush nuk e merr përsipër sepse nuk kanë fytyrë të na dalin përballë kur shohin që ne prapë vijojmë ta mbështesim Legjendën me gjithë shpirt!
President, ndërhy jepi drejtim, nuk mjafton ti varësh çelësat në qafë drejtuesve që vetëm fshihen, nuk mjafton ti llastosh lojtarët me paga marramendëse dhe pastaj të vazhdojnë në qejfin e tyre jashtë çdo objektivi por edhe larg paraqitjeve qe i kanë hije Partizanit …”
