Një tjetër krim në familje mund të ishte parandaluar, nëse gardisti nuk do të mbante armën e shërbimit tip pistoletë në shtëpi. Në orën 06:00, 44-vjeçari Alket Arapaj, punonjës i Gardës së Republikës qëlloi për vdekje bashkëshorten e tij 36-vjeçare.
Ai vrau bashkëshorten, ndërsa në shtëpi ndodhej edhe vajza e tyre e mitur. Gardisti është me arsim të lartë ushtarak (1993-1997), me gradën Kapiten me 21 vite punë ne Gardën e Republikës.
Në rrethin shoqëror dhe familjar, Arapaj njihet si person i sjellshëm dhe praktikues i fesë Islame, ndërsa gruaja ishte e mbuluar.
Referuar edhe një tjetër ngjarje të ngjashme, e ndodhur në prill të 2016-ës, del në pah një problematikë që zanafillën e nis që te rregullorja e brendshme e Gardës së Republikës, në varësi të Ministrisë së Brendshme.
Një prej rregulloreve strikte që duhet të zbatojë çdo punonjës i Gardës është dorëzimi i armëve të zjarrit, pas përfundimit të turnit.
