Në kohën kur dukej sikur vendi kishte rënë në qëtësi nga gripi i shpendëve, një rast i ri ka shtuar frikën. Sot është zbuluar një vatër e re në Shkodër.
Bëhet fjalë për një rast në një fermë private, teksa kanë rezultuar pozitiv me sëmundjen 70 krerë pula dhe janë gruposur.
Prefektja e Shkodrës, Majlinda Angoni, ka deklaruar në një konferencë për mediat se rasti është dërguar për analiza dhe ka rezultuar pozitiv.
Ajo theksoi se 70 krerë pula oborri janë groposur në një stabiliment në njësinë administrative të Dajçit.
“Kemi pasur një rast të dyshuar që u çua për analiza. Doli pozitiv. U tamponua zona. U morën të gjitha masat. Sot është gjithçka e izoluar.
Sot ishte edhe takimi për të paraprirë rastet e tilla. Gjej rastin të bëj thirrje që çdo rast i dyshuar të paraqitet te mjeku veteriner për të bërë analizat, dhe për të marrë masat e duhura. Janë 70 krerë pozitivë”, tha Angoni.
“Sot ishin në takim të gjithë përfaqësuesit, për të eliminuar që në qarkullim të rrugëve. Në momentin që do shihen njerëz me shpendë në dorë, do eliminohen pa shkuar te tregu. Është i ndaluar me ligj tregtimi i shpendëve të gjallë. Do të ndalohen dhe do të gjobiten ndërsa u sekuestrohet edhe malli”, tha ajo.
