Lënia jashtë treshes finaliste për çmimin “Lojtari më i Mirë” nga UEFA, e ka mërzitur shumë yllin francez të Atletico Madridit, Antoine Griezmann. Por sulmuesi shpreson që të jetë pjesë e garës për “Topin e Artë”, trofeu më i rëndësishëm për një lojtar, e cila zhvillohet në dhjetor. Në një intervistë, futbollisti francez foli për jetën e tij, sukseset e arritura dhe objektivat e ardhshme.
“Po kaloj një nga momentet më të mira në jetë, qoftë nga ana personale apo ajo profesionale, në klub dhe në kombëtare. Nuk ndihem më i dobët as se Messi e Ronaldo, mund të them me krenari se jam mes më të mirëve në botë. Shpresoj shumë ta fitoj Topin e Artë, do të jap gjithçka tre muajt e mbetur për këtë vit.
Sa i përket çmimit “The Best” tani nuk mund të bëhet më asgjë, ajo për të cilën më vjen më shumë keq është se asnjë kampion bote nuk u nominua. Lojtarë si Mbappé, Varane apo Kanté kanë luajtur në mënyrë të shkëlqyer. Gjithsesi, duhet të shohim përpara.”
Në sezonin 2017-2018 sulmuesi i Atleticos së Madriditarriti të fitonte tre trofe, Europa League, Superkupën e Evropës dhe mbi të gjitha, Kupën e Botës me Francën. Ndërsa ky sezon nuk ka nisur aspak mirë për të dhe skuadrën, pasi pas 4 javësh në LaLiga kanë grumbulluar vetëm 5 pikë, duke krijuar një diferencë prej 7 pikësh me kryesuesit e Barcelonës dhe 5 me rivalin e qytetit Realin.
