Ministria greke e Migracionit ka bërë me dije se ka shtyrë deri më 7 qershor, masën e izolimit të vendosur në kampet e mbipopulluara të migrantëve.
Për shkak të situatës së krijuar nga shpërthimi i pandemisë së koronavirusit, këto kampe janë izoluar që prej muajit mars.
“Masat kundër përhapjes së koronavirusit janë vazhduar për banorët e qendrave të pritjes dhe identifikimit në të gjithë vendin”, thuhet në deklaratën e ministrisë, raporton Rel.
Nuk është dhënë asnjë detaj në lidhje me arsyen pse është shtyrë masa e izolimit për kampet e migrantëve. Sipas mediave greke, shpërthimi i pandemisë ka ndikuar shumë pak në kampe.
Deri më tani, Greqia raporton 168 viktima nga koronavirusi, por asnjë nga këto nuk është shënuar në kampet e refugjatëve.
Që nga fillimi i muajit maj, në këto kampe kanë nisur të bëhen teste masive. Vetëm dy migrantë që arritën në ishullin Lesbos, në fillim të majit, kanë rezultuar pozitiv në COVID-19. Ata u vendosën në karantinë, në një kamp të përkohshëm.
