Autoritetet greke në pikën kufitare të Kakavijës kanë shpallur person të padëshirueshëm në territorin e Greqisë, pronarin dhe drejtuesin e RTV Alpo në Gjirokastër, Aristotel Petro.
Lajmi bëhet i ditur nga Unioni i Gazetarëve Shqiptarë, i cili e konsideron këtë një vendim të përsëritur ndaj gazetarëve shqiptarë, si privim nga të drejtat themelore si dhe cenim të klimës së fqinjësisë dhe lirisë së shprehjes në rajonin tonë.
Në shkresën formale që i është paraqitur Petros, nuk jepen shpjegime për arsyen e këtij vendimi.
“Unioni i Gazetarëve Shqiptarë shpreh shqetësimin se një vendim i tillë përbën një akt të rrallë privimi për lëvizje të lirë, të një përfaqësuesi të medias në rajonin kufitar mes Shqipërisë dhe Greqisë dhe fatkeqësisht, shton numrin e gazetarëve shqiptarë që shpallen të padëshirueshëm nga autoritetet zyrtare greke. UGSH shqetësimin e vet për këtë problem serioz e ngriti edhe në konferencën ndërkombëtare të SEMO-s, organizuar në Tiranë në fundvitin 2018, ku u kërkua reagim nga të gjitha organizatat e gazetarëve në rajon dhe prej atyre ndërkombëtare. UGSH u kërkon autoriteteve shqiptare të interesohen për rastin e fundit si dhe të sqarojnë rrethanat e mëtejshme për vendime të tilla me herët, si për rastin e gazetarit të njohur Marin Mema apo të kryetarit të Unionit të Gazetarëve të Qarkut Vlorë, Enrik Mehmeti”, sqarohet në njoftim.
