Presidenti grek Pavlopulos ka lëshuar të tjera deklarata kërcënuese ndaj Shqipërisë, teksa kërkon që Tirana zyrtare të ndryshojë qëndrim, përndryshe nuk e mbështet atë në rrugëtimin drejt Bashkimit Evropian.
Pas kërcënimit pak ditë më parë, ai është shprehur sot sërish se, Shqipëria po bën një gabim të madh duke rrezikuar të ardhmen në BE:
“Udhëheqja shqiptare bën gabim të madh që mbështet të drejtat e disave që ishin bashkëpunëtorë të nazistëve. Nuk mund të kesh aspirata evropiane dhe të kërkosh të drejtat e bashkëpunëtorëve të nazistëve. Kur Tirana të ketë një qëndrim tjetër, atëherë Greqia është këtu ta ndihmojë vendin fqinj për në BE,” deklaroi ai.
Sot, presidenti Meta i dënoi deklaratat e homologut të tij grek, se Shqipëria duhet të zgjedhë mes integrimit në BE dhe Çamërisë. Meta bëri thirrje për qetësi, ndërsa u shpreh se “qëndrimet e tij nuk sjellin energji pozitive. Pavlopulos nuk është në sintoni me Bushatin dhe Kotzias. Deklaratat e tij nuk i përgjigjen partneritetit. Duhet të ruajmë qetësinë dhe respektin reciprok”, tha Meta.
