Kryeministri Rama do të takohet sot me homologun grek, Alexis Tsipras. Mediat greke raportojnë se takimi do të zhvillohet në Londër, në kuadër të punimeve të procesit të Berlinit.
Kryeministri Tsipras është në Londër në një kohë trazirash politike për Brexit dhe pasdite do të marrë pjesë në një drekë pune të liderëve të vendeve pjesëmarrëse në të.
Më vonë ata do të marrin pjesë në takimin zyrtar, ndërsa pasdite do të takohet me kryeministrin e Shqipërisë, Edi Rama.
Në qendër të bisedës pritet që të jetë marrëveshja mes Shqipërisë dhe Greqisë për kufirin detar dhe çështjet e tjera të vjetra mes dy vendeve.
Sipas mediave greke, Tsipras nuk është gati për të firmosur marrëveshjen me Shqipërinë pasi po përballet me një mori kritikash nga opozita e vendit të tij pas paktit me Maqedoninë. Një situatë e tillë mund të shtyjë për pak kohë firmosjen e marrëveshjes me Shqipërinë.
Sipas zyrës së shtypit të Kryeministrit grek, takimi do të zhvillohet në orën 17:20 sipas orës së Londrës dhe do të zgjasë rreth 40 minuta.
