Greqia do të japë vaksinën falas për qytetarët e saj. Kjo gjë është konfirmuar nga kryeministri Kyriakos Mitsotakis, teksa është shprehur se sapo të sigurohet vaksina për koronavirusin, ajo do të jetë falas për të gjithë qytetarët grekë.
Gjatë një konference për mediat, ai tha se nuk ka informacione se kur një vaksinë e tillë do të jetë gati. Por sapo ajo të jetë në dispozicion, Greqia do ta shpëndajë falas për banorët e saj.
“Dua të jem absolutisht i qartë, vaksina do të jetë në dispozicion falas për të gjithë qytetarët grekë. Ne ende nuk e dimë nëse do të jetë një apo nëse do të ketë më shumë. Ne nuk e dimë kur do ta kemi në dispozicionin tonë.
Shpresojmë se do të vijë më shpejt. Por sapo të kemi vaksinën në dispozicion, ajo do të jetë falas, për të gjithë qytetarët grekë”, tha Mitsotakis.
Po kështu ai konfirmoi se shteti do të ofrojë falas edhe maskat për të gjithë studentët dhe mësuesit me nisjen e shkollave.
“Qeveria greke do të marrë përsipër të sigurojë maska falas për të gjithë fëmijët dhe të gjithë mësuesit”, u shpreh ai.
