Situata e krijuar së fundmi në Greqi, ka shtyrë kryeministrin, Aleksis Cipras t’i telefonojë kancelares gjermane, Angela Merkel, një ditë para votimit në Parlament të paketës së re të masave shtrënguese.
Nga zyra e Kryeministrit nuk është dhënë asnjë informacion mbi çka është folur mes tyre, por mendohet që Cipras i ka kërkuar Merkel të ndikojë në zbutjen e qëndrimeve dhe kërkesave të kreditorëve.
Greqia kërkon një formulë afatgjatë të shlyerjes së borxhit,i cili ka arritur në 315 miliardë euro ose 179 për qind të Prodhimit të Brendshëm Bruto (PBB).
Paketa që pritet të votohet sot në Parlament, do t’i kursejë shtetit 4,9 miliardë euro, e përkthyer në shkurtime të pensioneve, rritje të taksave dhe masa të tjera shtrënguese.
Votimit në parlament të masave shtrënguese, i parapriu një grevë e përgjithshme 24-orëshe e sindikatave publike e private, që çoi në paralizimin e transportit dhe jo vetëm, në mbarë Greqinë.
