Ditën e djeshme teatri Skampa në Elbasan ra pre e një grabitjeje, teksa persona të paidentifikuar ende hynë në ambientet e teatrit nga dera e pasme.
Kështu, grabitësit hynë në zyrën e financës, ku morën 4500 euro, të cilat financierja tha se ishin të vetat.
Por, teksa hajdutët bredhin të lirë me paratë e marra në teatër dhe edne nuk janë identifikuar, Policia ka arrestuar pikërisht rojën e objektit.
48-vjeçari Sokrat Thano u vu në pranga nga policia pasi akuzohet për neglizhencë në kryerjen e detyrës.
NJOFTIMI I POLICISE
Në vijim të informacionit të dhënë gjatë ditës së djeshme, ku persona të paidentifikuar në Lagjen “Luigj Gurakuqi” kanë tentuar të vjedhin me thyerje zyrat e katit të dytë në Teatrin Skampa por nuk kanë arritur të marrin asgjë nga Institucioni.
Nga veprimet e para hetimore dhe bazuar në deklaratën e Financieres së këtij institucioni rezulton se janë vjedhur rreth 4500 Euro në kasafortën e zyrës së Financieres së këtij institucioni dhe se kjo shumë parash ishte e saj personale të cilat i kishte lënë për ruajtje në zyrën e saj. Vijojnë hetimet për identifikimin dhe kapjen e autorëve.
Në vijim të veprimeve hetimore, specialistët për Krimet, në Komisariatin e Policisë Elbasan, bënë arrestimin në flagrancë të shtetasit:
Sokrat Thano, 48 vjeç banues në Elbasan.
Arrestimi i tij, u bë pasi shtetasi i lartpërmendur është i punësuar pranë një firme private dhe ka qenë i planizuar me shërbim roje objekti pranë Teatrit Skampa dhe dyshohet të mos i ketë përmbushur detyrat e tij funksionale duke neglizhuar në kryerjen e kësaj detyre.
Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Shpërdorimi i detyrës” dhe “Vjedhja e mbetur në tentativë” parashikuar nga nenet 248, 134 dhe 22 të Kodit Penal.
