Për grabitjen e miliona eurove në aeroportin e Rinasit më 9 prill, hetimet duket se kanë avancuar. Dyshohet se kanë qenë pesë grabitës, ku njëri prej tyre, Admir Murataj mbeti i vrarë pas përplasjes me armë me policinë, i cili dyshohej se ishte organizatori.
Sipas burimeve të Report Tv tashmë janë identifikuar dy nga pesë autorët e grabitjes spektakolare po mbahen në vëzhgim dhe shumë shpejt pritet që të arrestohen. Ata ndodhen brenda territorit shqiptar.
Shuma që autorët kanë grabitur dyshohet të jetë rreth 6.5 milionë euro, të cilat i përkisnin 3 bankave të nivelit të dytë. Ndërsa prokurorët që po merren me çështjen në fjalë kanë kërkuar nga bankat që të raportojnë shumën që kishin nisur drejt Vjenës.
Ndërsa dhjetë ditë pas grabitjes në aeroportin e Rinasit, Ministri i Brendshëm Sandër Lleshaj ka thirrur në një takim drejtuesit e Policisë së Shtetit. Takimi është zhvilluar në ambientet e ministrisë, ku i pranishëm ka qenë edhe Drejtori i Përgjithshëm i Policisë Ardi Veliu.
Sipas burimeve mediatike, takimi përveçse në rastin e grabitjes së Rinasit, është përqendruar në luftën ndaj krimit dhe në vijimin e goditjes së grupeve të strukturuara kriminale.
Ky takim vjen një ditë pas interpelancës në Parlament, ku Sandër Lleshaj iu përgjigj deputetëve të opozitës në lidhje me grabitjen në Rinas dhe masat e marra nga organet shtetërore.
