Lihet në burg Ragip Hajdini nga Kosova, i njohur me nofkën “daja” dhe i arrestuari i gjashtë për grabitjen e miliona eurove në aeroportin e Rinasit.
Hajdini ka dalë sot para Gjykatës së Krimeve të Rënda, e cila vendosi masën e sigurisë “arrest në burg”.
Ka qenë bashkëpunëtori i drejtësisë, Alkond Bengasi ai që ka orientuar policinë drejt shtetasit kosovar, për të cilin tha se e thërrisnin “daja”, se ishte tullac dhe se ishte takuar disa herë me të nëpërmjet Muratajt.
Por, vetë Ragip Hajdini i arrestuar si i dyshuari i gjashtë për grabitjen e Rinasit, ka deklaruar se nuk ka asnjë lidhje me grabitjen, duke shtuar se ka prova për këtë.
Ai ka kërkuar ballafaqim me Alkond Bengasin, si dhe ka pranuar që ka njohje me familjen e Admir Muratajt.
“Nuk jam unë “daja” që ju kërkoni dhe s’kam asnjë lidhje me grabitjen. Po të isha unë personi në fjalë, do të kisha ikur nga këtu, por nuk kam pasur arsye. Kam prova që s’kam marrë pjesë në grabitje. Me familjen e Admir Muratajt kam njohje.
Kam qenë duke drekuar në shkëmbin e Kavajës, dua të ballafaqohem me bashkëpunëtorin e drejtësisë Bengasi që më ka implikuar në këtë ngjarje. Kërkoj që edhe të hetohet se si ai që merr një rrogë 500 mijë ka një shtëpi luksoze. Unë nuk kam asnjë lidhje me këtë ngjarje”, mësohet se ka thënë Hajdini.
Ky i fundit u arrestua më 26 prill në zonën e Shkëmbit të Kavajës, si një nga të dyshuarit për grabitjen e 9 Prillit në Rinas.
Ragip Hajdini rezulton me precedentë të ngjashëm penalë edhe në Kosovë, aty ku ka qenë i dyshuar për grabitjen e 25 kg ar nga Dhoma e Dëshmive në Policinë e Pejës, bashkë me 5 persona të tjerë.
