Autorët e grabitjes së kryer dy ditë më parë brenda një banese në fshatin Qinam të Tiranës, kanë përfunduar në pranga.
J. A., 29 vjeç i dyshuar si organizatori i vjedhjes, si dhe bashkëpunëtorët e tij, dy vëllezër me incialet N. B., 20 vjeç dhe D. B., 26 vjeç, më datë 30 prill, duke u prezantuar si punonjës policie, janë futur në banesën e shtetasit B. Z. dhe nën kërcënimin e armëve, pasi i kanë lidhur pronarët e banesës, kanë vjedhur një sasi prej 40 mijë lekësh të reja dhe më pas janë larguar.
Policia ka arritur të bëjë arrestimin e tyre në fshatrat Grec dhe Tapizë.
“Në cilësinë e provës materiale Policia ka sekuestruar automjetin e përdorur nga autorët, si dhe njërën prej armëve, e cila u gjet nga polumbarët e Repartit Special RENEA e hedhur në lumin Tapizë dhe aktualisht grupi i zhytësve po punon për gjetjen e armës tjetër që kanë përdorur autorët.
Vijon puna nga polumbarët e RENEA-s, në lumin Tapizë, për gjetjen e armës tjetër që kanë përdorur autorët”, thuhet në njoftimin e policisë.
