Detaje të tjera dalin në lidhje me operacionin e koduar “AKUILA 2019”.
Bëhet me dije se shkak i shkatërrimit të bandës së shqiptarëve që vodhi 70 banesa në Francë, u bë një parfum i personalizuar.
Gjatë bastisjes së një vile, anëtarët e bandës, veç të tjerash, morën edhe një parfum ‘One Million Paco Rabane’ me shkrim të personalizuar, pa e ditur se ai do të bëhej prova e fortë e institucionit të akuzës kundër tyre. Parfumi u gjet gjatë kontrollit në shtëpinë e Alfons Përkolës në Laç, një prej tetë të arrestuarve. Në shishen e tij ishte gdhendur urimi “Gëzuar Krishtlindjen”.
“Kanë marrë lekët e vajzës tonë, të cilat gjendeshin në një kuti të vogël metalike të dhomës së saj, në bibliotekë një shumë prej 250 eurosh, si dhe një parfum ‘One Million Paco Rabane’, ku ishte shkruar emri i bashkëshortit tim ‘Ferdinand’. Ai gjendej në komodinën e dhomës tonë të gjumit. Shishja e parfumit ishte në dy ngjyra, gold dhe e zezë”, tha francezja Lambotte Dominique në polici.
Pas gjetjes së një sërë sendesh të vjedhura autoritetet franceze vunë në pranga 5 anëtarë të familjes Kajtazi, ndërsa në Shqipëri u arrestua Alfons Perkola, Besnik Fufi dhe Aleks Marku.
Nga hetimet e përbashkëta franko-shqiptare rezultoi se si bazë e bandës shërbente familja Kajtazi. Kjo e fundit u siguronte tre të dyshuarve banesën dhe mjetet për realizimin e grabitjeve. Pasi kryenin bastisjet e shtëpive dhe lokaleve, tre të arrestuarit në Shqipëri, riktheheshin në qytetin e tyre, në Laç, ku depozitonin sendet e grabitura.
Gjatë kontrolleve në shtëpitë e shqiptarëve u gjetën dhe u sekuestruan bizhuteri, një gjerdan me gurë të çmuar dhe sende të tjera me vlerë 300 000 euro.