Kryeministri Edi Rama gjatë një takimi me sipërmarrës turistik të Kavajës e Golemit ku u fol mbi problematikën por edhe zhvillimet pozitive në këtë sektor, vuri në dukje mbështetjen e madhe që qeveria e tij dha për turizmin, për të cilën tha se nuk është e fundit.
Në përgjigje të shqetësimit të operatorëve turistik që morën pjesë në këtë takim, lidhur me gjendjen e infrastrukturës në këtë zonë, Rama premtoi sistemimin e plotë të zonës së plazhit të Golemit.
“Është biseduar me Bashkinë e Kavajës për projektin e sistemimit të pjesëve të brendshme të zonës dhe qeveria është e gatshme ta mbështesë atë, në kuadër të një financimi prej 71 milion eurosh që Banka Botërore ka bërë për turizmin në Shqipëri,” tha ai.
Ulja e TVSH-së nga 20 në 6%, sipas tij është një frymëmarrje e madhe që i është dhënë këtij sektori, pasi e përllogaritur, kjo ulje shërben për kompensimin e energjisë elektrike për operatorët, vlerësoi Rama.
Gjatë bashkëbisedimit ai u ndal edhe tek rëndësia që ka agroturizmi dhe ripërtëritja e trashëgimisë kulturore, çka sipas tij do të kompletonte larmishëm hartën turistike të vendit tonë.
