Shqipëria tashmë është kthyer në një vatër tërmetesh. Goditje të tjera janë ndjerë gjatë natës, e ndërsa epiqendra është zhvendosur në Vorë.
Gjatë natës dhe orëve të para të ditës së sotme, janë regjistruar të tjera lëkundje tërmeti.
Teksa deri në orët e vona të një dite më parë epiqendra vijonte të ishte Gjiri i Lalzit, pak më vonë, ajo u zhvendos fillimisht drejt Vlorës, më pas në Fier, e së fundi ka goditur Vorën.
Mini-tërmetet ndodhin gjatë gjithë kohës në të gjithë territorin e Shqipërisë, kjo pasi vendi ynë është një territor aktiv.
Statistikat kanë treguar se tërmetet me magnitudë 4.5 janë të shpeshta, maksimumi dy herë në vit, minimumi njëherë, ndërsa tërmetet mesatare 5 deri në 5.5 ndodhin njëherë nga 2 deri në 5 vjet.
Tërmetet e forta, ato mbi 5.5 janë tepër të rrallë, kërkojnë dekada, mbi 10 vjet. Kjo për një arsye fare të thjeshtë, sa më i madh të jetë tërmeti, aq më shumë energji akumulohet, dhe aq më shumë kohë do që të ndodhë.
Tërmetet nuk mund të parashikohen, po duke qenë të përgatitur nga rajonizimet e kryera, mund të merren masa efektive, për të mos pasur katastrofa të dhimbshme.
