Numri 7 tek Juventusi është i rezervuar, duke pritur të ngjitet në shpatullat e një kampioni të madh si Cristiano Ronaldo. Kjo do të jetë goditja e “shekullit” në merkato për bardhezinjtë por edhe për të gjithë futbollin. Një epokë e lavdishme mbyllet dhe një e re me shumë pritshmëri hapet, kjo ditë duket se është më pranë se kurrë për yllin portugez.
Dita e re, për të cilën flasin mediet europiane, është e marta, për shkak se në Madrid zhvillohet një takim i rëndësishëm. Bëhet lidhja me të martën, pasi më 10 korrik do të mblidhet Asambleja drejtuese e madrilenëve, e në këtë rast, presidenti Florentino Perez, i cili ka heshtur publikisht, do të zbulojë të gjitha letrat për fituesin e “Topit të Artë”.
Biznesmeni që drejton Realin kërkon nga Cristiano Ronaldo, që të jetë pikërisht futbollisti, ai që të pranojë se kërkoi largimin. Kështu, përgjegjësia e divorcit do të binte mbi lojtarin, për të evituar përplasjet me tifozët. Ronaldo nuk ka dëshirë të kënaqë presidentin, duke e konsideruar një hakmarrje të vogël, për ftohtësinë që shoqëroi rinovimet dhe kërkesat.
Në lidhje me detajet financiare të transferimit të bujshëm, 110 milionë euro mund të mjaftojnë për Juventusin që të marrë Ronaldon. Kjo shumë vlerësohet si e rikuperueshme në pak kohë, për shkak të marketingut. Por jo vetëm kaq.
25 milionë euro do të marrë superagjenti Jorge Mendes, njeriu që do të bekojë transferimin më të bujshëm të shekullit. 30 milionë në sezon do të marrë Cristiano Ronaldo, në një lëvizje surprizë që po bën tifozët e Juves të besojnë edhe më shumë se do të ndodhë.
