Bandat shqiptare duket se po fuqizohen edhe më shumë. Policia franceze ka shkatërruar bandën e grabitësve, të cilët akuzohen për vjedhjen e 98 shtëpive. Anëtarët e klanit të grabitësve, besohet të kenë vepruar në mes nëntorit 2017 dhe tetorit 2018, duke vjedhur dhjetëra banesa.
Bëhet fjalë për 6 persona me origjinë shqiptare, të cilët janë vënë në pranga. Gazeta “Le Parisien” shkruan se shqiptarët dyshohen për vjedhje të stolive dhe sendeve të tjera me vlerën e 423 mijë eurove, në rajonin e Bordos dhe Toulouse. 5 burra dhe 1 grua me origjinë shqiptare, të moshës 30 deri 40-vjeç, identitetet e të cilëve nuk bëhet me dije, u arrestuan të hënën në Bergerac (Dordogne).
Sekuestrohen lekët, armët, mjetet, etj
Policia ka sekuestruar 13,500 euro para të gatshme, automjete të vjedhura, armë, municione si dhe 2.5 kilogramë shufra ari.
Teknikat e tyre kanë rezultuar me sukses, pasi ata kanë përfituar nga mos prezenca e pronarëve në shtëpi.
Grabitësit kanë shfrytëzuar mungesën e pronarëve, për të thyer një dritare, duke vjedhur bizhuteritë dhe sendet e tjera të vlefshme.
Të 6 të dyshuarit, të gjithë të njohur për policinë për të njëjtat akuza, u vendosën në paraburgim në xhandarmërinë e Bergeracit.
Hetimet janë ende në zhvillim e sipër. Ata do të dalin të enjten ose të premten para gjykatës së Bordosë, për masën e sigurisë.
