Drejtuesja e Misionit të Vëzhguesve të OSBE/ODIHR-it, Audry Glover, përgjatë një konference për mediat komentoi sot zgjedhjet e 30 qershorit që u mbajtën ditën e djeshme në Shqipëri.
Glover theksoi se tërheqja e opozitës dhe dhuna e tyre, kombinuar me median e polarizuar çoi në një atmosferë shqetësuese.
“Administrata lokale në disa qytete nuk bëri pjesën e vet për të përmbushur detyrën. Media nuk pati pavarësi, ajo u fokusua tek pjesa politike. Tërheqja e opozitës dhe dhuna e tyre për të penguar zgjedhjet, kombinuar me një media të polarizuar çoi në një atmosferë shqetësimi. Ne pamë prova se votuesit ishin nën presion nga të gjitha palët politike.
Kjo nuk e bëri votuesin të votonte i lirë. Kjo cenoi besimin e votuesve. Megjithatë pavarësisht pasigurisë, zgjedhjet u mbajtën dje. Nëse morën apo nuk morën pjesë, ata të gjithë duhet të trajtoheshin me respekt. Aktorët politikë duhet të punojnë në emër të të gjithë qytetarëve jo vetëm në të atyre që i mbështesin. Ky raport do të mbajë rekomandime. U kërkojmë aktorëve që të punojnë në emër të të gjithë qytetarëve të këtij vendi”, tha Glover.
