Tashmë është zbardhur dëshmia e autorit të vrasjes në Shkodër, ku mbeti i vdekur ish-futbollisti i Vllaznisë, Gledis Kraja.
Autori i dyshuar, Stjuart Smakaj, ka pranuar krimin e kryer, ku humbi jetën shoku i tij i ngushtë.
Stjuart Smaka ka rrëfyer të gjithë rrjedhën e ngjarjes së rëndë, që nga konflikti deri tek momenti që është ngjitur për të marrë në katin e dytë armën e modifikuar, ku edhe ka zbrasur 14 plumba. Autori Stjuart Smaka është shprehur se shokun e ka vrarë gabimisht, pasi ka qëlluar në drejtim të makinës ku ishte Denis Halili, i cili ka qenë edhe shenjestra e objektivit.
Smakaj ka deklaruar në polici se gjatë sherrit, shtetasi Denis Halili është larguar në drejtim të makinës së dezinfektimit dhe në atë moment i ka lindur dyshimi se mund të marrë ndonjë armë. Ndaj është ngjitur me shpejtësi në katin e dytë në pallatin ku banonte, dhe ka marrë armën me idenë për të qëlluar shtetasin Denis Halili, por nuk e ka ditur se pas makinës ka qenë edhe shoku i tij.
“Kam qëlluar në drejtim të makinës, ku ishte Denisi, por nuk e dija se aty kishte shkuar edhe shoku im dhe e kam vrarë gabimisht”, ka thënë ai. Smakaj ka sqaruar edhe pjesën tjetër të ngjarjes që sherri ka nisur për parkimin e kamionit të mobilieve, të cilat i kishin porositur dy vëllezërit dhe më pas janë konfliktuar fizikisht mes njëri-tjetrit.
Ndërsa shtetasi Denis Halili ka deklaruar se kur ka ikur në drejtim të makinës, atë e ka ndjekur nga pas shtetasi Gledis Kraja, që të mos futej brenda në mjet. Në atë moment kur të dy ndodheshin te makina, kanë dëgjuar krismat e armës. “Kam ikur me shpejtësi, jam shtrirë dhe më pas kam ikur me vrap për t’i shpëtuar plumbave. Duke ikur, kam parë se Gledis Kraja ishte plagosur dhe ra në tokë”, ka deklaruar Halili.
