Pedagogu i kriminologjisë Ervin Karamuço, ka deklaruar se ish-kreu i Policisë së Shtetit, Gledis Nano, duhet marrë në mbrojtje, pasi ka qenë njeriu që i është vënë nga mbrapa të gjitha grupeve terroriste në Shqipëri. Dje, emailet nxorrën në pah shkëmbime informacionesh mbi persona të kërkuar, mbi atentate të mundshme ndaj politikanëve, si në rastin e ish drejtuesit të opozitës shqiptare Lulzim Basha, apo kryeministrit të Kosovës Albin Kurti, si dhe komunikime të Nanos me partnerë të huaj, për çështje sensitive, të konsideruara sekrete. Përkundrejt deklarimeve të autoriteteve, se të dhënat zyrtare nuk janë prekur, sulmi kibernetik duket se ka depërtuar në thellësi. Pedagogu i kriminologjisë Ervin Karamuço, në një intervistë në “ABC e Mëngjesit” tha se Gledis Nano është ekspozuar për Sirinë dhe për Iranin.
“Ai është një target për shkak se ka qenë drejtor i Anti-Terrorit. Ka qenë njeriu që i është vënë nga mbrapa të gjitha grupeve terroriste në Shqipëri. Ka informacion për këta. Është ekspozuar për Sirinë, është ekspozuar për Iranin. Ka bërë operacione që shumica e tyre nuk do të dihen, disa kanë qenë shumë të suksesshme që ju kanë bërë shumë dëm atyre.
Veçse kanë ndaluar, kanë arrestuar, kanë përndjekur shumë prej tyre me të drejtë nga ana e shtetit tonë me partnerë ndërkombëtarë. Edhe të nxjerrësh informacionet e tij, të dhënat personale të familjarëve të tij, të bankave, numrave dhe gjithçka, do të thotë ta bësh një shënjestër. Ai duhet marrë në mbrojtje”, tha ai.
