Përfaqësuesit e shoqërisë së Becchettit kanë reaguar lidhur me njoftimin e Ministrisë së Infrastrukturës dhe Energjisë, se Shqipëria kishte fituar gjyqin në Arbitrazh për çështjen e hidrocentralit të Kalivaçit, kundër kompenisë Hydro s.r.l.
Në një reagim për Top Channel, kjo shoqëri shpjegon se ka detyrimin të saktësojë se vendimi i dhënë nga Gjykata e Dhomës Ndërkombëtare të Tregtisë është një Vendim i pjesshëm për të cilin nuk është bërë asnjë cilësim vlere dhe për të cilën vetë Gjykata është e rezervuar.
Në reagim thuhet se është me vend të qartësohet se ky “vendim i pjesshëm nuk ka marrë në shqyrtim provat e depozitura lidhur me shpronësimin e koncesionit sepse ato janë dorëzuar më vonë. Përkundrazi, Arbitrat ftuan Hydro-n për të filluar një arbitrazh të dytë. Hydro, më 30 qershor 2017, njoftoi Qeverinë Shqiptare dhe Ministrinë e Energjisë për kërkesën e dytë për Arbitrazh në të cilën nga Hydro ICC-së ju kërkua të konstatojë: Keqbesimin kontraktor nga ana e Ministrit të Energjisë për krijimin e provave të rreme nëpërmjet agjencisë në varësi të tij, AKBN, lidhur me moskryerjen e pretenduar të punimeve të përgatitjes së materialit për trupin e digës në Kalivaç, siç u pranua më në fund me shkrim edhe nga vetë Qeveria dhe mbi të cilat u mbështet e gjithë çështja penale, veçanërisht kundër Francesco Becchettit. Detyrimin e Ministrisë së Energjisë për të paguar kompensimin për shpronësim siç parashikohet në Marrëveshjen e Koncesionit”.
Dëmet për të cilat Hydro pretendon shpërblim llogariten në qindra miliona euro, ndërsa seanca e parë në këtë arbitrazh u mbajt më 23 janar 2018.
Edhe administratori i hidrocentralit, Ceccobelli reagoi për Top Channel teksa deklaroi se do të sugjeronte që, për të informuar publikun shqiptar në mënyrë transparente, ministri Gjiknuri duhet të presë derisa të shpallet vendimi përfundimtar i Arbitrazhit dhe rezultatet e shumë çështjeve tjera që janë në zhvillim.
Kliko KËTU për të parë njoftimin e Ministrisë së Infrastrukturës dhe Energjisë.
