Në Gjykatën e Krimeve të Rënda po zhvillohet seanca plenare, ku pritet që të merret vendimi për 5 anëtarët e grupit “Lazarati”, për vrasjen e efektivit të RENEA-s, Ibrahim Basha.
Pikërisht sot, Arbjon Aliko ka hedhur akuza të rënda ndaj ish-ministrit të Brendshëm, Saimir Tahiri, teksa tha:
“Na kanë sulmuar si fis sa erdhi në pushtet PS-ja, policia e nxori drogën me blinda nga Lazarati në vitin 2014. Policia e Shtetit ua shiste drogën trafikantëve, këtë e bënë banditët e Saimir Tahirit”, u shpreh ai.
Ndërkohë, ditën e djeshme e ëma e Elvis Boçit, një prej të akuzuarve të grupit, tha se policia i ka marrë edhe paratë gjatë kontrolleve në banesë:
“Nga kontrollet e kryera në vitin 2015, më saktë pas 17 kontrolleve të ushtruara nga Policia e Shtetit nuk është gjetur asgjë. Erdhi edhe një grup hetimor dhe pas kontrollit nuk u gjet asgjë. Në datën 26 qershor erdhi Policia e Shtetit në shtëpi dhe më pyet për çunat. Më çuan në komisariat dhe më kanë nxjerrë në orën 2 të mëngjesit dhe kur kam shkuar të shtëpia në qytet, kam gjetur derën hapur. E kishin kontrolluar dhe shkatërruar shtëpinë. Për Tahirin, pritën muaj për të bërë një kontroll, ndërsa ne s’na morën as leje. Nuk është ligji i barabartë për të gjithë?! Kur kam shkuar te shtëpia në Lazarat, më kishin marrë edhe djalin e vogël. Edhe lekët që kisha në shtëpi m’i kishin marrë. Në Lazarat nuk u luftua fenomeni i drogës, por banorët. Ata që erdhën atje ishin bandë dhe jo polici. Ishte banda e Saimir Tahirit”, ka thënë ajo, duke hedhur akuza të forta ndaj Policisë së Shtetit.
Më pas, fjalën e ka marrë Arbion Aliko, i cili ka bërë edhe ai akuza: “Unë dua të falënderoj që i dëshmove të gjitha”, ka thënë ai, duke iu drejtuar nënës së Elvis Boçit.
“E vërteta po del, ai qelbësira, Saimir Tahiri dhe disa policë janë në ndjekje”, ka thënë Aliko, deri sa gjyqtari i ka ndërpresë fjalën.
