Në kuadër të luftës kundër kultivimit të bimëve narkotike, Policia e Shkodrës vijon operacionin e koduar “Koordinata” në territoret e pesë njësive administrative të qarkut.
Gjatë kontrolleve të fundit janë sekuestruar dhe asgjësuar gjithsej 4639 bimë të dyshuara Cannabis Sativa. Tre persona janë shpallur në kërkim, pasi dyshohet se kanë kultivuar 780 bimë narkotike në fshatin Bajzë, si dhe kanë lidhur në mënyrë të kundërligjshme energjinë elektrike për të mbështetur këtë aktivitet kriminal.
Po ashtu, janë proceduar penalisht 5 kryetarë fshatrash për shpërdorim detyre dhe moskallëzim krimi, si dhe dy shtetas të tjerë për moskallëzim krimi.
Në njësitë administrative Shosh dhe Pult, policia asgjësoi 3092 bimë Cannabis Sativa. Për këtë rast janë referuar materialet në Prokurori kundër kryetarëve të fshatrave Gimaj, Vuksanaj dhe Nicaj, si dhe një shtetasi tjetër për moskallëzim të krimit.
Në Kastrat, në bashkëpunim me Drejtorinë Vendore të Policisë Malësi e Madhe, u asgjësuan 1274 bimë narkotike. Në këtë zonë, tre persona janë shpallur në kërkim për kultivim dhe lidhje të paligjshme të energjisë elektrike. Përveç tyre, janë proceduar edhe kryetarët e fshatrave Bajzë dhe Hot.
Në njësitë Shllak dhe Temal, u asgjësuan 273 bimë të dyshuara narkotike.
Policia vijon punën me intensitet për identifikimin dhe ndëshkimin e të gjithë autorëve të përfshirë në kultivimin e bimëve narkotike në qarkun Shkodër.
Operacioni “Koordinata” është pjesë e strategjisë së forcave të rendit për goditjen e këtij fenomeni kriminal në territorin e qarkut.
