Sot u zhvillua ceremonia e betimit para Presidentit Bajram Begaj, të anëtarit të ri të Gjykatës Kushtetuese, Ilir Toska. Gjyqtari Toska me dorën mbi Kushtetutën e Shqipërisë, u betua para Presidentit Begaj: “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë”. Presidenti Begaj i uroi suksese Ilir Toskës, në detyrën e re të anëtarit të Gjykatës Kushtetuese.
Në ceremoninë solemne të betimit ishin të pranishëm Kryetarja e Gjykatës Kushtetuese, Vitore Tusha, Kryetari i Gjykatës së Lartë, Sokol Sadushi, Kryetari i Këshillit të Emërimeve në Drejtësi, Sokol Binaj, Këshilltari Ligjor Rezident i OPDAT pranë Ambasadës së SHBA-së në Tiranë, Constantine Soupios si dhe kreu i Sektorit Politik në Delegacionin e BE-së në Tiranë Alexis Hupin, si dhe anëtarë të Kabinetit të Presidentit të Republikës.
Ilir Toska, anëtari i tetë i Gjykatës Kushtetuese (nga nëntë gjithsej), u zgjodh nga Gjykata e Lartë më 12 shtator.
Toska është vlerësuar me 85.44 pikë, ndërsa i ka kaluar të dyja shkallët e Vettingut. Në listën e KED e dyta ishte renditur gjyqtarja Manjola Xhaxho me 83.34 pikë, ndërsa e treta gjyqtarja Holta Zaçaj me 82.2 pikë. Pas mungesave të krijuara nga procesi i Vettingut, Gjykata Kushtetuese e nisi punën në dhjetor 2020, pasi u plotësua kuorumi me 7 anëtarë. Aktualisht, me shtimin e zotit Toska në radhët e saj, ajo ka në përbërje 8 anëtarë. Gjykata e Lartë propozon dhe ka të drejtë emërimi për 3 anëtarë të Gjykatës Kushtetuese, nga 9 që ka gjithsej ajo. 3 përzgjidhen nga presidenti dhe 3 të tjerët nga Parlamenti.
Lista e anëtarëve të Gjykatës Kushtetuese
- Dr. Vitore Tusha, Kryetare
- Marsida Xhaferllari, anëtare
- Dr. Fiona Papajorgji, anëtare
- Dr. Elsa Toska, anëtare
- Altin Binaj, anëtar
- Sonila Bejtja, anëtare
- Dr. Sandër Beci, anëtar
- Ilir Toska, anëtar
