Gjykata e Elbasanit la në burg dy rusët dhe ukrainasin, që tentuan të futen në uzinën e përpunimit të armëve në Gramsh. Avokati i caktuar për shtetasin rus, Mikhail Zorin, Demir Çiftja deklaroi se klienti i tij nuk i ka pranuar akuzat. Avokati i rusit është shprehur se klienti i tij nuk e pranon këtë vendim dhe se kërkon një masë më të butë. Ai shtoi më tej se ka kërkuar që të njihet me materialet e Prokurorisë, dhe ku e bazojnë vendimin, por kjo gjë u është refuzuar.
“Do ti mbetet hetimit kjo situatë në të ardhmen. Nuk jam në dijeni. Ai sqarimet i ka dhënë. Sqarimet e tij janë sekret hetimor. Unë kam kërkuar që i mbrojturi prej meje, ka konfliktuar me dy ushtarët se është ndjerë i dhunuar. Ka përdorur një spraj me spec djegës. Kjo ka qenë ngjarja. Dhe për këtë e kanë akuzuar për kundërshtim të punonjësve.
Ka edhe një akuzë tjetër për spiunazh. Nuk e bëri të qartë Prokuroria. Ne kërkuam të njiheshim me materialet. Por Prokuroria i bie shkurt dhe thotë kemi prova. Klienti im nuk i pranoi akuzat. Kërkoi një masë sigurie më të butë”, u shpreh ai.
