Ish-kryebashkiaku Fatos Tushe ka apeluar vendimin e Gjykatës së Posaçme kundër Korrupsionit dhe Krimit të Organizuar, e cila i vendosi masën e sigurisë “arrest me burg”. Avokatët mbrojtës të Tushes i janë drejtuar Apelit, ku kërkojnë masë më të butë sigurie, pasi sipas tyre, nuk ka prova që e implikojnë në abuzimin me tenderin 240 milion lekë, për rehabilitimin e kanalit vaditës.
Me kërkesë për masë më të butë sigurie, Apelit i janë drejtuar edhe 10 vartësit e Tushes, të cilët u vunë në pranga rreth një javë më parë, pasi SPAK ka ngritur ndaj tyre tre akuza, atë të “falsifikimit të dokumenteve”, shpërdorimit të detyrës” dhe “abuzimit me tendera publike”.
Pak ditë më parë, Rama përjashtoi ish-kryebashkiakun e Lushnjes, Fatos Tushe nga Partia Socialiste, i shkarkuar nga detyra pas akuzave të SPAK për korrupsion. Numri një i qeverisë u shpreh se shkarkimi dhe përjashtimi i tij janë masa që mund të rishikohen vetëm nëse në fund të procesit, rezulton i pafajshëm nga akuzat e ngritura ndaj tij. GJKKO la në burg ish-kryebashkiakun e Lushnjes Fatos Tushe, i cili akuzohet për shpërdorim detyre. Ishte SPAK që kërkoi masën e sigurisë “arrest me burg” për Tushen, kërkesë kjo që u miratua pas shqyrtimeve në GJKKO.
Tushe u arrestua për “shpërdorim detyre”, me akuzën e abuzimit me fondet publike. Me urdhër të SPAK gjithashtu u arrestuan edhe dhjetë punonjës të tjerë të Bashkisë.
