Zjarri i rënë mbrëmë në Tepelenë rreth orës 21:30 ka vijuar gjatë gjithë natës, duke djegur sipërfaqe të mëdha pyjore.
Banorët janë ndjerë të rrezikuar dhe kanë braktisur shtëpitë, por fatmirësisht për shkak të erës, zjarri është zhvendosur në pyje, duke mos përfshirë banesat.
Aktualisht rezultojnë të djegura 3 hektarë me pyje, ndërsa një helikopter ka mbërritur nga Tirana në orët e para të mëngjesit për të neutralizuar flakët e zjarrit.
Nga zjarri rrezikoheshin lagjja ‘15 shtatori’, spitali dhe depot e ujit, të cilët ndodheshin rreth 500 metra afër vatrës së zjarrit, por tani situata është normalizuar dhe situata është nën kontroll.
Fillimisht me flakët u përballën zjarrfikësit e Tepelenës me 6 automjete, ndërsa më pas kanë mbërritur edhe shërbime të Emergjencave Civile.
Tashmë në terren janë ende shërbimet e Emergjencave Civile, 20 forca ushtrie dhe zjarrfikëset nga Gjirokastra, të cilët po normalizojnë situatën, ndërsa nuk dihen shkaqet e zjarrit.
