Sekretari i Përgjithshëm i PS-së, Damian Gjiknuri, ka thënë në një prononcim për mediat se sot pas mbledhjes së kryesisë do të jepen emrat e kandidaturave për Presidentin e ri. Ai konfirmoi se pasditen e sotme do të mësohet emri i kandidatit, që sipas tij, do ta bëj siç duhet rolin e Presidentit. Gjiknuri nuk ka preferuar që të japë emra për kandidatin e mundshëm për President, duke kërkuar që opinioni publik të ketë edhe pak durim deri në mbledhjen e kryesisë pasditen e sotme.
“Një nga defektet që do ia vendosja në dukje opozitës, është që ishte e paaftë për të diskutuar emra. Për aq kohë sa jemi pjesë një forumi të lartë të PS-së, aty do të diskutohen të gjitha emrat.
Mos u bëni të pa durueshëm, sot pasdite do të mësoni dhe emrin e kandidatit që do e bëj siç duhet rolin e Presidentit”, tha Gjiknuri.
“Ja lamë opozitës në dorë, se si do e formatonin grupin e tyre negociator, për të dalë me kandidat apo me disa kandidatë. Preferuan më shumë konfrontimin para mediave se sa negociata konkrete. Është shans i humbur nga ana e opozitës, nuk kam çfarë të shtoj më. Ermi i Presidentit do të diskutohet sot në kryesi, ku është marrë mendimi edhe i deputetëve.
Janë zhvilluar konsultime për profilin e duhur që i duhet vendit në këtë moment. Do të thotë që të gjitha emrat janë në konsideratë, por natyrshëm grupi negociator do të marrë vendim për propozimet përkatëse. Ne shpresojmë dhe jemi të bindur se do të kemi shumë shpejt një President të zgjedhur”, tha Gjiknuri.
