Rafael Nadal është një kampion i madh dhe këtë e ka treguar me gjestin e bërë pas përmbytjeve të ndodhura në Mallorca mbrëmjen e së mërkurës. Numri 1 në botën e tenisit ka udhëtuar në ishujt Baleare, ku zona më e prekur rezultoi Sant Llorenç des Cardassar, ku humbën jetën edhe dy turistë anglezë, për ti ndihmuar ata.
I tronditur nga tragjedia tenisti 32-vjeçar ka nisur nga puna vullnetare duke dhënë kështu kontributin e tij në komunitet. Pasi ka hapur dyert për të mirëpritur viktimat e përmbytjeve është rreshtuar për të liruar rrugët e mbuluara nga balta. Rafa ka hapur dyert e strukturës së tij akademisë ‘Rafa Nadal’ për të gjithë ata që e gjejnë veten të pastrehë apo kanë nevojë rimarrin forcat.
Nadal, nëpërmjet një postimi në “Twitter” deklaroi hapjen e dyerve të akademisë së tij të tenisit për të strehuar personat e prekur nga përmbytjet.
“Është një ditë e trishtuar për Majorkën. Ngushëllimet e mia për familjarët e viktimave nga përmbytjet e Sant Llorenç. Duke parë situatën e krijuar, vendosëm të hapim dyert e Akademisë Rafa Nadal për të gjithë personat që kanë mbetur të pastrehë dhe që kanë nevojë për një vend ku të qëndrojnë”, shkruante Nadal në rrjetin social.
Bilanci i përmbytjeve në Mallorca flet për 10 persona të vdekur, dhjetëra të zhdukur dhe qindra të pastrehë.
