Gjermania dhe Britania nuk do e njohin pavarësinë e Katalonjës. Zëdhënësi i qeverisë gjermane, Steffen Seibert deklaroi se Gjermania mbështet qeverinë spanjolle dhe së nuk do ta njohë pavarësinë, të cilën e shpalli sot pasdite parlamenti katalonas.
Sipas Seibert, Berlini po përcjell me shqetësim eskalimin e situatës në Spanjë, duke përmendur se shpallja e njëanshme e pavarësisë shkel parimet e sovranitetit dhe integritetit territorial të Spanjës.
Ndërkohë, edhe Britania ka pohuar mosnjohjen e pavarësisë së Katalonjës. Këtë e bëri të ditur zëdhënësi i kryeministres Theresa May, i cili tha se kjo deklaratë është e bazuar në një votim që ishte shpallur ilegal.
Ai ka shtuar që Britania dëshiron të shohë ruajtjen e unitetit të Spanjës.
Pasditen e sotme Parlamenti i Katalonjës votoi pro deklaratës së pavarësisë nga Spanja, ndërsa parlamenti spanjoll ka aprovuar shtrirjen e sundimit direkt në këtë rajon.
