Janë disa lojëra që janë cilësuar si të rrezikshme si për fëmijët dhe për të rriturit. Sigurisht varësia ndaj lojërave që janë trendi i momentit është e madhe dhe shoqëritë përpiqen ti ndalojnë kur ato kthehen të pa sigurta. Në Gjermani janë bllokuar mbi 35 tonë të ‘fidget spinner’ pasi janë cilësuar si ‘të pasigurta’. Ato priten të shkatërrohen nga dogana gjermane.
Lodrat janë konfiskuar në doganën e Aeroportit të Frankfurtit, nga ku pritej të shiteshin nëpër dyqane.
Lodrat rrotulluese kishin arritur në Gjermani nga Kina. Këto pajisje kanë pushtuar botën, mirëpo modelet e “pasigurta” kanë drita LED të cilat lehtësisht mund të shkëputen nga pajisja e të përpihen nga fëmijët e vegjël, ka thënë Zyra Qendrore e Doganës, transmeton Koha.net.
Sipas zyrtarëve doganorë, pajisjeve u mungonte edhe shenja CE, që kërkohet për mbrojtjen e konsumatorit.
Muajin e fundit, një vajzë e vogël në Texas, Houston, është dashur t’i nënshtrohet një operacioni pasi i kishte ngecur në fyt një copë e ‘spinnerit’. Fatmirësisht, operacioni ka kaluar me sukses.
