Deputeti i zgjedhur i Partisë Demokratike në Lezhë, Agron Gjekmarkaj ka komentuar zhvillimet e fundit në selinë blu, ku me 13 qershor do të votohet për kreun e ri të kësaj force politike.
I ftuar në emisionin ”Open”, Gjekmarkaj tha se mbajtja e zgjedhjeve në PD është frymë pozitive, dhe se vetëm kjo parti mund t’i prijë betejës kundër vjedhjes së votave.
Sipas tij, disa persona pa integritet, të cilët i quajti pallaço apo horra dhe që janë pjesë e PS, e morën këtë fitore në mënyrë të padrejtë, duke garantuar se kjo është vetëm një fitore e parakohshme.
Agron Gjekmarkaj: ”Unë mendoj që PD duhet të kishte reflektim edhe nëse do të fitonte. Data u afrua se kështu e solli situata. Është terapi për PD që të ketë një proces zgjedhjesh. Është e rëndësishme që të jenë zgjedhje të ndershme. Unë e shoh këtë si një frymë pozitive në PD, qoftë edhe debatin. Ndryshon se në Shqipëri janë vjedhur zgjedhjet dhe qytetarët duan zgjidhje, dhe kush tjetër veç PD do i prejë kësaj beteje? Horra, batakçinj, laramanë i janë mbledhur PS-së dhe i kanë marrë qytetarëve një fitore hajdutçe.
Në dukje duket sikur ia kanë dalë, por është e përkohshme. Institucionet janë kapur. Ne kemi shpresa te një reflektim i ndërkombëtarëve. Tjetra është trysnia popullore. Ata do përballen me shoqërinë, e cila nuk vdes asnjëherë, por reagon. Ka dy kandidatë sot, Basha dhe Kadilli. Mund të ketë kandidatura të tjera. PD duhet të rishohë Këshillin Kombëtar, Kryesinë e saj, të hapet pa kushte që të ketë një kryetar të fortë, një Këshill Kombëtar dhe kryesi të fortë.”
Partia Demokratike ka vendosur të hapë garën për kreun e ri të saj dhe zhvillimin e votimit sipas parimit një anëtar një votë, në 13 qershor.
Vendimi i marrë mbrëmjen e së dielës nga kryesia, afron me pak më shumë se një muaj, këtë proces, i cili sipas statutit do të duhej të zhvillohej në muajin korrik.
