Deputeti i zgjedhur i Partisë Demorkatike nga zgjedhjet e 25 prillit, Agron Gjekmarkaj ka komentuar procesin e zgjedhjeve brenda selisë blu, për kreun e kësaj force politike.
I ftuar në emisionin ”Frontline” në ”News 24”, Gjekmarkaj u shpreh se kryedemokrati Lulzim Basha është më i favorizuar në këtë garë.
Sipas tij, detyra e Bashës është të marrë mandatin e mbrojë partinë, nga agresioni në të cilin ndodhet. Gjekmarkaj shtoi se 25 prilli ishte një masakër elektorale, e cila nisi me prishjen e marrëveshjes së 5 qershorit.
Agron Gjekmarkaj: ”Nuk varet fati i PD nga një individ. Basha ka detyrën të mbrojë PD dhe ekzistencën e saj nga agresoni ku ndodhet. Nën agresion shtetëor,mediatik, dhe e ka detyrë për ti qëndruar në ballë dhe për të marrë mandatin tjetër për të realizuar ëndrrat dhe dëshirat e qytetarëve. E vërteta është një, s’ka dy. Ne në PD besojmë që kemi pasur një masakër elektorale, inxhinieri, vjedhje masive. Inxhinieria ka filluar më 5 qershor, ndryshimi i Kodit, Kushtetutës, rindërtimit, të gjitha format që i përdori kryeministri.
Ka pasur probleme teknike, por nuk ishin këto relevante, stema e manipulimit. Ka ndodhur më parë. Ne në PD besojmë që kemi pasur masakër, kur besojmë këtë, s’kemi pse fajësojmë Bashën dhe as dorëheqjen tjetër. Ata që pranojnë masakrën dhe kërkojnë dorëheqjen e Bashës atëhere ushqehen nga ambiciet personale. Në Shqipëri ka ndodhur masakra më e madhe elektorale në 30 vite, atëhere akuza që mund t’i bëhet Bashës është pse nuk rezistoi ushtarakisht. Por PD nuk është parti militare.”
Më 13 qershor, Partia Demokratike zhvillon zgjedhjet për kryetarin e ri. Përballë Lulzim Bashës, do të garojnë Edith Harxhi, Agron Shehaj dhe Fatbardh Kadilli.
