Ish-ministri grek i Financave, Yanis Varoufakis ka deklaruar se miliarderi amerikano-hungarez George Soros, kishte kërkuar që ai të largohej nga qeveria e majtë.
Teksa foli për televizionin Skai, Varoufakis tha se Soros telefonoi kryeministrin Alexis Tsipras në korrik të 2015-ës dhe kërkoi shkarkimin e tij nga kabineti.
“Shkalla e marrëdhënieve të mia me Sorosin është e kufizuar në atë telefonatë”, tha ai, duke iu referuar pretendimeve të Ministrit të Mbrojtjes Panos Kammenos, që përfshin Sorosin dhe pagesat ndaj anëtarëve të kabinetit grek.
Varoufakis e përshkroi Kammenosin si një neofashist në të njëjtën kategori si kryeministri hungarez Viktor Orban dhe zëvendëskryeministri dhe ministri i brendshëm italian Matteo Salvini, raporton ekathimerini.
I pyetur për negociatat e tij të vazhdueshme me kreditorët e Greqisë në gjysmën e parë të vitit 2015 dhe koston e tyre për vendin, si dhe kërkesën e Demokracisë së Re konservatore për një komision hetimor për të hetuar negociatat, Varoufakis tha se do të mirëpriste një gjykatë ushtarake “nëse guxojnë ta bëjnë një të tillë”.
