Ekonomia shqiptare po vijon të konsolidohet me ritme të shpejta, ndërsa këtë e ka konfirmuar Gurvenatori i Bankës së Shqipërisë, Gent Sejko. Sipas Sejkos, ekonomia shqiptare ka vijuar të rritet në 6 mujorin e dytë të 2017-s, ndërsa ka shtuar se niveli i kredive të këqija ka rënë ndjeshëm, një lëvizje e cila do të ndikojë në përmirësimin e ekonomisë në vijimësi.
“Ekonomia shqiptare ka vijuar të rritet në 6 mujorin e dytë të 2017-s. Norma bazë e interesit do të vijojë të mbetet e pandryshuar në nivelin 1,25%. Niveli i kredive me probleme ra në nivelin 13.2%. Përshpejtimi i rritjes ekonomike kërkon vijimin e reformave strukturore”- u shpreh Gent Sejko.
Në fjalën e tij Sejko njoftoi se Këshillit Mbikëqyrës të BSH ka vendosur për uljen e përdorimit të euros, si strategji për të avantazhuar lëvizjen e monedhës vendase.
Guvernatori i Bankës së Shqipërisë ka shtuar se shërbimi financiar i bankave mbetet në përmirësim të vazhdueshëm. Megjithatë, sektori bankar duhet të jetë me aktiv në kreditim. Niveli i kredive me probleme ra në 13.2 për qind.
Megjithëse në rritje, inflacioni në vend vijon të mbetet i ulët dhe nën objektivin 3% të Bankës së Shqipërisë. Në aspektin makroekonomik, kjo ecuri pasqyron stadin e zhvillimit ciklik të ekonomisë sonë dhe nivelet e ulëta të inflacionit të importuar.
Një problem tjetër është dhe performaca jo e mirë e bizneseve, pasi sipas bankës, bizneset nuk zbatojnë mjaftueshëm kapacitetet e tyre, duke krijuar një ngadalësim në punë dhe rrjedhimisht edhe në shërbim dhe në përmirësimin e kushteve.
“Ndonëse në rritje, kërkesa agregate mbetet ende e pamjaftueshme për të shfrytëzuar në mënyrë të plotë kapacitetet prodhuese, sikundër ilustrohet nga fakti se norma e papunësisë mbetet mbi nivelin e saj natyral dhe se bizneset raportojnë një shfrytëzim ende jo të plotë të kapaciteteve. Ky fenomen pengon rritjen e pagave, të kostove të prodhimit dhe të marzheve të fitimit, në linjë me objektivin tonë për inflacionin”-tha mes tjerash Genti Sejko.
